Oiwei, wenn er in da friah midm Radl zum Bäcker fahrt, foit am Maxe de oide Dorflindn auf: obwois vor vui hundert Jahr vo am Blitz droffa woan is und innen hohl war, stets imma no majestätisch in da Mittn vom staadn Bauerndorf.
D’Oidn vazäihn oft Gschichtn, dass d’Lindn scho im Mittloita ois Treffpunkt fia d’Dorfbewohna hergnomma woan is und desweng magische Kräft hätt, aber des hod da Maxe ned wiarglich obkafft. A wenn da dicke Baamstamm mit de langa Äst irgendwie zum umanandasantln eilod hod er si ned vorstäin kenna, dass a so a oida Bam verhext sei kannt.
Des kannt dir aa gfoin
An oam hoaßn Sommadog war da Maxe mit seine Spezln beim Fuaßboi spuin aufm Boizblotz im Nachbarort, ois si auf oan Schlog d’Woikn zuazong ham. Sei Muatta hodn scho gwarnt ghabt, dass a schwars Gwitta aufziagt, desweng hoda ihra vasprocha, dass ers rechtzeitig backt, bevors zum wehdan ofangt. Sofort hod er sein Ledaboi backt, Servus zu de Spezln gsogt und is auf sein Drohtesl gstieng und hoamwärts gfahrn, ois scho de erstn dickn Rengdropfa vom Himme gflong san.
Scho noch a baar Meta ham si de dickn Rengdropfa zu weiü-graue Haglkerndl vawandelt, de jetzt wia Eisklumpn aufn Maxe gfoin san. Er war ungefähr bis zur Dorfmittn kemma, ois des Sauwehda z‘eglhaft woan is: er hod si so schnäi wias gäd irgendwo unterstäin miassn und wartn, bis zumindest da Hagl aufgheart hod. Mittlerweile hods a no ogfanga zum Donnern und Blitzn und da Himme hod zum prasslndn Haglschaua kracht und gflackert. Da Maxe hod in a baar Meta Entfernung a Birkn gseing und hod si gegen d’Windrichtung neba den junga Baamstamm gstäit. Jetzt wara erleichert, weil da Untastand gscheid herghoitn hod. Ois er wieda a bissl bessa gseng hod hod er a baar Meta vo erm weg de oide Dorflindn erkennt ghabt, de so ausgschaut hod ois dats erm im Haglsturm wia unterm Zahna ogrinsn. Da Maxe hod zruckglacht, weil er a wenig Vertrautheit gspürt hod und gmoant hod, er warad jetzt in Sicherheit.
Auf oamoi hod er a leise Stimm gheart, de gflüstert hod: „Kimm umme do zur Lindn“. Da Maxe hod gmoant, dass er si vaheart hod und hods erstmoi ois Spinnarei obedo. Wahrscheinlich wars bloß da brudale Sturm gwen, der wos in dem Moment mit seim Vastand gspuit hod.
Aber noch a baar Minutn hod er nomoi de leise Stimm gheart: „Du bist ned in Sicherheit, kimm bessa umme zur Lindn, i sogs da doch!“. Da Maxe hod no a baar Sekundn zögert, dann hod er si zamgrissn und is rüberglaffa zur oidn Lindn. Do okemma hod er sies tatsächlich im hohln Baamstamm gmiatlich macha kenna: vui griabiga wars do und da Wind hod bloß no staad an da rauen Baamrindn vom oidn Dorfbaam ohnegwuislt.
Kaum hod si da Maxe a wenig erhoit ghabt hods auf oamoi an brudalen Schlog do und er hod si erschrocka umdraht: A Blitz hod in d’Birkn eigschlong, de wos er no kurz davor zum Schutz aufgsuacht ghabt hod. De hod auf oamoi wia Stroh brennt und war wie a Scheitl Hoiz in zwoa große Hälftn gspoitn. „Wos warad bloß bassiert, wenn i oiwei no do gstandn warad?” hod si da Maxe jetzt gfrogt ghabt.
Mit dem Schock hod des Wehda a scho sein Höhepunkt erreicht ghabt und da Hagl hod si in leichtn Reng zruckvawandelt, ois scho d’Dorffeiawehr mit laudm Sirenengschrei eitroffa is und as Feia an da Birkn mit a dickn Schaumdeckn eighüllt ghabt hod.
„Maxe, do bist ja“, hod da Richard, Maxe sei Nachbar und Vorstand vo da Dorffeiawehr, gsogt, „die Muadda hod si scho große Sorgn gmacht, und woi zurecht wia ma siehgt. Hättst du de Birkn ois Unterschlupf gwählt hätts di sauwa dabreslt moan i“.
Da Maxe hod kurz übalegt, ob er vo seim Erlebnis erzähln soit und hod dann beichtet: „Richard, da war wos ganz Komischs: i war davor scho bei da Birkn gstandn, aber auf oaoi hod ma a Stimm gflüstert, dass i unbedingt zur oidn Lindn nübergeh soi.“
Da Richard hod kurz zur Baamkrone vo da Lindn auffegschaut, dann kurz nochdocht und gsogt: „Des is echt komisch Maxe. Vor ungefähr 300 Jahr hods amoi an Buam in deim Oita gem, der hod Baltasar Kasper ghoaßn. Der is damois vom Blitz daschlong woan, ois er si bei am ähnlichn Sauwehda unta de oide Lindn gstäit hod, seitdem is aa hohl. Du findst sei Grob no drüm aufm Friedhof! Schaugt so aus, ois ob da Baltasar zumindest desmoi mit seina Wahl richtig gleng war“.
Da Maxe is no a baar Minutn wia vastoanart vor da Lindn gstandn. Dann hod er staad gflüstert „Mease Baltasar“ und hod si vo da oidn Dorflindn verabschiedet, de wos erm ab dem Dog oiwei magisch bleim werd.
