Original:

Rezeptbuach “Fresh”

Des kannt dir aa gfoin

Immunschnapserl

Rote Nikolosubbn

Bergfelslebkuacha

Kategorien:

Kocha, Vegetarisch, Mediterran

Infos:

Perfekt fia hoaßt Sommerdog, wenn ma moi koa Fleisch mehr im Kühlschrank hod und olle Gschäfter zua ham: da vegetarische Griechndöna!

Inspiriert von der Fleischversion, des im Schützenheim dank griechischem Nachbarrestaurant oft gibt, hod ma mit ziemlich wenig Aufwand an schnäin warmen Imbiss.

Des Rezept is fia vier Griechndöna docht.

Zeitn:

Je nochdem, ob ma an Zaziki und de Pita selm macht braucht ma entsprechend länga oda kürza. Mit kafftm Pita-Brot braucht ma fia Zaziki und Füllung ungefähr 20 Minutn.

Zuatatn:

• 5 Teeleffe Olivnöl zum Obrodn
• 4 Pita-Brote: de kafft ma am Bestn scho fertig ei, weil de säibagmachtn aus unsrer Erfahrung nia gscheid wern und an Aufwand ned wert san
• Zwoa Teeleffe Paprikabuiva
• Zwoa Teeleffe Knoblauchbuiva
• A Backal Feta-Kas
• A Tassn gloagwürfede Gurkn
• A Tassn gloagwürfede Tomatn
• A baar Salotbladl
• A Viertlte Tassn gloagschnittne rote Zwieven

Zuabereitung:

1. Oa Teeleffe Olivnöl in a Pfanna auf middlara Stufn gem
2. Jeds Pita auf olle zwoa Seitn mit je am hobin Teeleffe Olivnöl bestreicha und mit Paprika- und Knoblauchbuiva bestrahn
3. Jede Seitn in de Pfanna schmeißn und obrodn, bis de Pita knusprig san. Aufbassn, dass as Gwürz ned vabrennt, zur Not obeschoitn
4. As Pita aufschneidn, olle restlichn Zuatatn noch Beliebn einegem und gnießn!