Wartn auf Nix

Oft is des a guads Gfui zum wissn, dass se de Welt no dreht. Vom Mond aus gseng scheint es fast so, ois war unser scheener Planet a ganz eigener komplexer Organismus, de großn Städt pulsiern und wirkn wia Dioden, de moi stärker und moi schwächer leuchtn, während de Weltmeere ruhig und leise um de Kontinente herumfließn. In dem Bild san mir Menschn de Atome und Elektronen, de se wia programmiert hi und her bewegn. Wia fest mir in unserm Alltagstrott gfangen san, hod aa de Maria beobachtn kenna, de jeden Dog mit am Zug in de Arbeit fahrt und der es manchmoi vorkimmt, ois war se in ara ewign Schleifn gfangen.

Manchmoi hod de Maria de Menschn und ihre Gwohnheitn beobachtet: Jeder war doch irgendwia anders auf seine Art. Da oide Mo, der jeden Morgn de Neuigkeitn in da Zeitung glesn hod, de Massn an Schüler, de se gegnseitig ihre Spui und Fotos aufm Smartphone zoagt ham. De Frau, de im Winter fleißig an ihrm Pullover gstrickt hod und im Sommer kloane Tragetaschn. Da „Manager“, der schon früh am Morgn de ganze Fahrt lang telefoniert hod, da „Oansame“, der mit Kopfhörern an da Zugtür zur Musik nickt hod, de junge Studentin, de jeden Dog wieder a poar Seitn mehr vo ihram dickn Roman glesn hod, und so vui Persönlichkeitn mehr. Bsonders aufgfoin war da Maria aber a Bua, der imma oafach bloß lachend im Zug gsessn is und nix doa hod. Manchmoi hod er de Augn zuamacht, hod aber munter weitergrinst.

Oan Morgn hod de Maria wissn wolln, weswegn da Bua so fröhlich war, und hod des Gspräch mit eam gsucht: „Hey, mir is aufgfoin, dass du auf da ganzn Zugfahrt nia wos machst. Weder hörst du Musik, no hob i di jemois an deim Smartphone tippn gseng. Is dir ned langweilig?“

Da Bua hod de Maria oglacht und mit ara angnehma Stimm antwortet: „Woaßt, i warat froh, wenn mir in meim Lebm amoi langweilig war. Des is aa da Grund, warum i nix doa.“

„I versteh ned ganz, willst damit sagn, dass du vui zum doa hast, aber de Zeit im Zug trotzdem ned nutzt?“, hod se de Maria verdutzt über de ungwöhnliche Antwort vom Buam gwundert.

„Genau so schaut des aus“, hod da Bua grinst, „schau di nur do im Abteil um, jeder is imma beschäftigt, egal ob er wos zum doa hod oder se bloß de Zeit vertreibn will. Es gibt so vui Serien zum ogschaun, Biacher zum lesn, Musik zum hearn, dass mir hunderte Lebm brauchatn, um ois ozschaun, wos uns interessiert. Zeit is so kostbar woan, dass jeder sie nur irgendwia nutzn, ja sie fast auspressn will wia a Zitrone. Wos aber komisch is: Egal, wia guad mir unsere Zeit nutzn, mir wern doch ned glücklicher. Vielmehr wern mir unzfriedn, redn mir uns doch ein, mir hättn mehr vo unserer Arbeit erledign kenna. Mir san gstresst, weil mir de ganze Zeit auf unserm Handy rumtippt ham, statt uns oafach amoi zum entspanna und unser Lebm zum reflektiern.

Deswegn hob i mi dazu entschiedn, jeden Dog während da Zugfahrt de Ruah zum genießn, wenn i koane Verpflichtungen hob. I frei mi an so vuin Sachan und schau oafach bloß zua, wia ois um mi rum pulsiert. Manchmoi mach i a poar Minutn mei Augn zua und spür, wia schee es is, gsund zum sei. Es langt mir dann, wenn mei Herz munter schlagt und meine Blutkörperl eilig umanandhasten, während i vollkommen zur Ruah kimm. Warum gönna mir uns so selten a Auszeit, a kloane Verschnaufpause mittn in da Hektik vo de Städt und vo da ganzn Hast? I woaß, dass se de Erdn sowieso scho vui zu schnell dreht, i wart auf nix.“

In dem Moment hod da Zug langsam abbremst, bis er schleichend den Zielbahnhof erreicht hod.

„I wünsch dir an scheena, schaffensreichn Dog“, hod da Bua gsagt und is gmütlich aus da Tür vom no leise schnaubenden Zug gangen.

De Maria is no a poar Sekundn auf ihram Platz sitznbliebn, bevor aa sie den restlichn Fußweg zur Arbeit ogetretn hod.

„Auf wos für am seltsamen Planeten mir doch lebn“, hod se leise bei se denkt, „ois scheint so gregelt wia in am funktionierenden Kreislauf, bloß mir Menschn drahn manchmoi im wahrstn Sinn vom Wort durch. Warum kenna mir uns ned aa am Puls vo da Zeit ausrichtn? Warum san fünf Minutn Wartezeit für uns vergeudet, während kloane Kinder in da selbn Zeit sofort ofanga, Spui zum spuin oder se an neie Sachan zum frein?“

An dem Dog hod se de Maria vorgnumma, de Welt wieder mehr wia a Kind zum segn und über de Wunder vo dera Welt zum staunen, und megn de aa no so kurz und kloa sei. Und ois se am nächstn Dog wieder gegenüber vom Buam Platz gnumma hod und de ganze Fahrt über nix gsagt hod, hod se gmerkt, wia se a breites Lächeln über ihr Gsicht breit gmacht hod.

Hod dir da Artikel gfoin? Auf Facebook teiln Auf Instagram folgn

Mia san aa auf Instagram und Facebook

Neie Gschichtn, Bilder und Gaudi: gleich folgn und nix mehr verpassn.

Koarb
Nach oben scrollen