Servus, i bin da Robert
Sproch woar scho ois Kind mei große Leidenschaft: In da ersten Klass hob i ma – no vor olle andern – s’Lesn selm beibrocht, indem i „Peter und der Wolf“ Seitn für Seitn entschlüsselt hob. De Freid o da Wortkunst is bliebn, und übers Gedichteschreim für Geburtstog und Feste hob i irgendwann wieda ganz zum Schreim g’funden – mittlerweile san üba 200 Gedichte und 50 Kurzgschichtn zsammkemma.
2023 hods dann g’langt: Zsamm mit meiner Frau hob i mei erstes Buach „Bergauf“ aussegem – a Berggedichtnband, in dem mei große Liab zur Natur und de Berg drin steckt.
Mittlerweile hob i mi aa intensiv mit da bairischn Sproch beschäftigt und im Rahma vo Boarischkult a boar Dutzend eigne bairische Wörter (Neologismen) erfunden. Da Großteil vo meine Gedichte und Gschichtn is bairisch gschriem und beschreibt Eindrück und Erfahrungen aus meiner Hoamat in Oberbayern.
Auf dera Seitn zoag i mei eigns Schreim, aber lass aa gern andere bairische Stimma zu Wort kemma – schau di gern durch’s ganze Magazin! Wer si aa no für mei philosophischs Nebenprojekt „Idealhumanismus“ interessiert, findt des unter idealhumanismus.de.
📖 Meine Büacha
Zwoa Büacha vo mir gibt’s aktuell zum Kaffa – Bergwandern und bairische Dichtkunst, sowia stimmungsvolle Weihnachtsgschichtn aus Wasserburg am Inn.
✍️ Meine Gedichte und Gschichtn
🎤 Lesungen
Nächste Lesung: 19.11.2026, 18:30 Uhr – Glühturm Winterlesung, Turmstube Grafing, zsamm mit Wolfgang Hofer, Lisa Lohmaier-Wachinger & Albert Zimmerer.
I les regelmäßig bei Winter- und Frühlingslesungen in da Gegend um Grafing, Bruckmühl und Tulling – meist zsamm mit andere bairische Autoren wia Wolfgang Hofer oder Mathias Verch. Für Ofrag wegn ana Lesung bei dir in da Nähe, meld di eafach!