Da oide Mo und da Brief

Wider alle Erwartung war doch no da Vaterl Frost eingezogn in de kloane Stadt, es war wenige Dog vor Weihnachtn und dicke Schneeflockn ham se leise auf de Häuser und Gassn glegt. Auf da kloan Bank vor da Postfiliale is a oida Mo mit grau-weißm Bart gsessn, der grod fein säuberlich verzierte Buchstabn auf a dickes Blatt Papier gmalt hod. Schließlich is a junger Bursch vorbeikemma, der sein Blick grod vo seim Smartphone abgwendt hod, ois er den oidn Mo gseng hod.

„Guada Mo, es is a Schand, dass Sie se bei dem Schneetreibn no immer mit Briefschreibn abmühn miassn. De Buchstabn san scho hoib verwischt und as Abschicka kost aa no Zeit und Geld. Mit am Smartphone kenntn Sie so vui kostenlose Nachrichtn schnell und bequem abschicka, wia Sie wolln. Wenn Sie oans ham, kon i Eana gern zoang, wia des funktioniert.“

Da oide Mo hod durch seine Brilln nauf zu dem Buam gschaut und gschmunzelt:

„Und so schnell, wia de Nachrichtn verschickt san, so wenig werd über den Inhalt nachdenkt. Des is nett gmoant, aber da Inhalt vo meim Brief is mir vui zu wichtig, ois dass Zeit a Roll spuin tat.“

Da Bua war a wenig verdutzt über de schlagfertige Antwort, hod aber no ned aufgebn und weiter versucht, den oidn Mo vo da modernen Technik zum überzeigen:

„Wenn Sie wolln, kenna Sie Eana so lang Zeit nehma, wia nötig, umso praktischer is es, dass Sie de Nachrichtn korrigiern oder sogar löschn kenna, wenn Sie aus Versehn an Fehler gmacht ham. Des geht bei am altmodischn Brief sicher ned so oafach.“ Da oide Mo hod aber ned lockerlassn und hod wieder mit am forschn Blick kontert:

„Genau des is des Problem vo da heitign Gsellschaft: Es werd nimma vorm Absendn nachdenkt, nimma reflektiert, weil ja sowieso jede unüberlegte Dummheit rückgängig gmacht werdn ko. Es is wia bei de Fotos: Vielleicht ham mir im Gegnsatz zu früher mehr Versuche, a wirklich guads Bild zum schießn, umso mehr versinkt aber da Rest in da Belanglosigkeit.“

Da junge Bursch war erstaunt über des erneute Parieren vo seine Argumente, hod aber no a letztes Mal versucht, den oidn Mo zum überzeigen:

„Es mog sei, dass des auf manche Menschn zutrifft, Sie ändern aber Eana Art, Nachrichtn zum schreibn, ned, aber a wesentliche Sach werd ganz deitlich optimiert: Da Empfänger muass ned lang auf den Brief wartn, sondern kriagt de Nachricht no in da selbn Sekundn!“

Jetzt war da Bua gspannt, ob da oide Mo immer no a Antwort auf Lager hod. Der hod kurz owi gschaut auf den verschmierten Brief und auf den Schnee drunter, dann hod er tief eiogatmet und gsagt:

„Wissn Sie, junger Mo, mi überrascht, wia sehr se de Menschn in da heitign Zeit imma in da Eil verhaspeln. Ned amoi jetzt zur Weihnachtszeit is es de meistn möglich, amoi innezuhaltn und zur Ruh zum kemma. Wer vo de Smartphone-Besitzer kennt no des warme Gfui, noch so langm Wartn freudig mit da Antwort vo am guadn Freind belohnt zum werdn?

Wo bleibt bei da Digitalisierung de Sehnsucht noch am Lebnszeichn vo am liebn Menschn, der ned den ganzn Dog „online“ erreichbar is?

Wia oft seids ös jungen Erwachsenen sogar no enttäuscht und frustriert, wenn ned sofort a Rückmeldung kimmt oder de erwartete Nachricht kurz und geistlos ausfoit?

Und wia jämmerlich wirkt a emotionslos im Zug noch Feierobnd glesene Whatsapp-Nachricht vom vielleicht wichtigstn Menschn gegn an auf am warmen Sofa in Ruah glesenen Brief vo am weit entfernten Freind, bei dem ma gspannt jede oanzelne Zeil verschlingt?

Wia vui mehr innere Wärm entfacht da liebevolle Brief an des Christkind vo am kloan Kind im Gegnsatz zur so bequemen Amazon-Bestellung kurz vor Weihnachtn?

Aber jetzt entschuldigns mi, i muass mein Brief jetzt no abgebn. I wünsch Eana a frohe und gsegnete Weihnacht im Kreis vo Eana Familie!“

Da junge Bursch is wia versteinert stehnbliebn, es is eam doch seine ganze Sicht auf amoi so falsch vorkemma. Im Nachdenka über olle de Sachan hod er no gseng, wia da oide Mo mit am nassn Brief in da Hand durchs Friedhofstor ghuscht is, bevor er im Schneegstöber verschwundn is.

De kloane Gschicht soll uns zoang, dass es ned imma auf a Perfektionierung in unserm Lebm ankimmt. Vielmehr soitn mir uns de Zeit nehma, de neie schnelle Welt oafach kurz ohne uns weiter rotiern zum lassn.

Am End stirbt doch a Stückl Menschlichkeit durch de so unreflektierte Technisierung, de zwar sicher aa ihre Berechtigung und Vorzüge in am modernen Lebm hod, aber wohl spätestens des, wos uns am wichtigstn is, ned abschwächn soit: de Beziehungen zu unsere Familien und Freind. In dera imma hektischer wergnden Vorweihnachtszeit vom 21. Jahrhundert soit es zum Nachdenka anregn, ob de wunderbarn Sachan vo unserm Lebm ned oft im Kloan und Unscheinbarn verborgn lieng.

Und vielleicht fühlt se da oane oder andere dabei ertappt, an liabn Menschn ganz altmodisch an Brief zum schreibn, der vielleicht erst nach Weihnachtn okimmt, aber doch des schönste Gschenk vo olle sei kannt.

Hod dir da Artikel gfoin? Auf Facebook teiln Auf Instagram folgn

Mia san aa auf Instagram und Facebook

Neie Gschichtn, Bilder und Gaudi: gleich folgn und nix mehr verpassn.

Koarb
Nach oben scrollen