Da kloane Leo – Weg für imma

Und as Kalenderblattl hod zoagt, dass wieder Juni woan war. De letztn Dog wars imma wärmer woan und da Leo hod se nimma erinnern kenna, wann s zum letztn Moi so richtig dunkel gwen war. Jeden Dog is er scho ins Bett ganga, bevor de Sonn komplett untergangen war, meistns aber war da Himme scho blutrot gfärbt und de Grillen in da Wiesn neben Leos Zimmer ham eam in Schlaf zirpt.

Da Leo hod se imma gfragt, wo denn de Sonn imma genau untergeht und wia des dort wohl ausschaun tat. Wahrscheinlich bliebats oafach hell, wenn ma da Sonn bloß lang gnua nachfolgn tat.

„Papa, warum muass i eigentlich imma so früh ins Bett gehn?“, hod da Leo an am Obnd enttäuscht gfragt, gar zu gern hätt er an dem Dog no länger drauß gspuit. „Des is ganz oafach, Leo: Wenn s dunkel werd, gehst ins Bett. Du woaßt ja vom Winter, wia de Dunkelheit ausschaut, des is im Sommer ned anders, bloß dass es spada dunkel werd, des hod mit de Jahreszeitn zum doa. Wenn du im Sommer länger wachbleibn tatst, tatst am Dog drauf spada aufstehn und nomoi spada ins Bett gehn. Des tat so lang ganga, bis du bloß no im Dunkeln lebn tatst, und des willst ja aa ned, oder?“, hod sei Vater mit ernstm Blick gsagt, und da Leo hod im Bett no a wenig über seine Wort nachdenkt. Tatsächlich war des ziemlich bläd, wenn s imma dunkel sei tat.

Am nächstn Dog is de Familie abends am Tisch gsessn, ois da Leo auf amoi verkündt hod: „I geh heit no weg.“ Da Opa hod a wenig verdutzt gschaut und daraufhin antwortet: „Soso, des is ja interessant, und wia lang willst weggehn?“

Da Leo hod kurz überlegt und gsagt: „Für imma! I hob scho olle Sachan packt, de i in da Zeit so brauch.“

Da Vater vom Leo is a wenig zornig woan und hod an Leo laut gfragt: „I hob dir doch gestern Obnd no gsagt, dass du im Bett bist, wenn s dunkel werd. Du bleibst schee dahoam.“

Trotzig hod da Leo seinen Vater ogschaut und antwortet: „Ja genau, wenn s dunkel werd, geh i ins Bett! Deswegn geh i oafach da Sonn nach, dann werd s nimma dunkel und i muass nimma ins Bett gehn!“

Da Opa hod kurz aufglacht, hod am Vater vom Leo zuazwinkert und dann gmoant: „Da hod da Leo recht, wenn s nimma dunkel werd, muass er aa nimma ins Bett. Dann wünsch i dir a guade Reis und vielleicht kost uns ja a Kartn schicka.“

„Des mach i gern!“, hod da Leo zfrieden gsagt, ois er begriffa hod, dass er jetzt für imma wach bleibn kannt. Aa a Kartn hod er scho amoi gschriebn und abgschickt, des sollt also aa funktioniern.

So hod se da Leo aufn Weg Richtung Westn gmacht, denn dort is de Sonn imma untergangen. Er hod an kloan Wanderstock aus Holz ghabt, den eam da Opa damals gschnitzt hod, und an kloan Rucksack, in den er a poar vo seine Spuizeig gsteckt hod, falls eam de nächste Zeit doch amoi langweilig werdn sollt. Gottseidank hod er seine Sonnenbrilln dabeighabt, denn de niedrig stehende Sonn hod fast scho den ganzn Horizont in a helles Liacht taucht, sodass da Leo ned amoi richtig erkenna hod kenna, wos eam de nächstn Meter so erwartn tat.

Noch a poar Minutn hod da Magn vom Leo auf amoi laut ogfangt zum knurrn: Er hod vorher vergessn, wos zum Obndessn, ois er seine Sachan für de Reis packt hod. Aa is er so langsam durstig woan und erst jetzt is eam aufgfoin, wia bequem de Ausflüg mit da Mama doch imma gwen san. Seine Mama hod imma an ois denkt: a poar große belegte Brot, a poar Äpfe, a guada Schokoriegl und Apfelschorle ham jede Unternehmung versüßt, ob des jetzt da Zoobsuach oder de Sonntagswanderung in de Berg war.

Doch so schnell wollt er ned aufgebn, schließlich war da Leo doch erst vor kurzem losganga und hod no an weitn Weg vor se ghabt. Noch wiederum a poar Minutn Wanderung is wos Unerwartets passiert: Da rote Kreis am Himme hod se drohend imma weiter noch untn gsenkt und war scho bis zur Hälfte abtaucht, ois s imma dunkler woan is! Da Leo hod s goar ned glauba kenna und hod auf amoi ganz schnell Richtung untergehende Sonn zum laufa ogfangt. Er is grennt und grennt, doch es hod ois nix gholfa: A poar Augnblicke spada hod da Leo oafach nimma kenna, vui zu erschöpft war er und hod verzweifelt feststelln miassn, dass er hungrig und durstig alloa irgendwo auf am Feldweg in da Dämmerung gstandn is. So hod er se des Ganze mit Sicherheit ned vorgstellt! A kloane Trän is am Leo de Wang owi grunna, schließlich hod er ned gwusst, wos er jetzt macha soll: Im Dunkeln tat er den Weg hoam gwiss nimma findn.

Auf amoi is hinter eam a laute Stimm ertönt: „Leo, Leo, do bist ja!“ Da Leo hod gseng, wia seine Eltern aus dem dunkelroten Sonnenliacht aufm Radl auf eam zuakemma san. „Es schaut so aus, ois war dei Plan ned ganz aufganga“, hod da Vater vom Leo glacht und eam durch sei wuscheligs Haar gstrichn. Jetzt hod da Leo richtig ogfangt zum woana, aber sei Vater hod eam sofort tröstet: „Sei ned traurig, Leo, mir ham dei Vorhaben sehr mutig gfundn. Du hast sogar recht ghabt, wenn du schnell gnua laufa tatst, dann werd s nia mehr dunkel. Allerdings ko koa Mensch so schnell laufa, denn des war so schnell, wia se de Erdn dreht! I hoff, du hast erkennt, dass es manchmoi koan Sinn hod, mim Kopf durch de Wand zum renna. Ab und zu gibt es Momente im Lebm, an denen ma oafach umkehrn muass.“

Da Leo hod zu seim Vater aufgschaut und mit weinerlicher Stimm gsagt: „Aber i hob doch oafach bloß a bissl länger wach bleibn wolln.“

Da Vater hod kurz überlegt, hod zur Muatter vom Leo rübergschaut, kurz nickt und dann gsagt: „Deine Muatter hod se heit wirklich Sorgn gmacht, mir mögn ned, dass du oafach alloa vo dahoam weggehst, und i glaub, du hast aa eigsegn, dass des wirklich gfährlich werdn ko. Trotzdem wolln mir dir a Stückl entgegenkemma, denn aa dei Muat ghört belohnt! Ab sofort därfst abends a Stund länger wach bleibn, wenn du dafür an Mittagsschlaf hoitst, wia klingt des für di?“

Da Leo hod seine Trän ausm Gsicht gstrichn, hod ogfangt zum lächln und gsagt: „Des geht in Ordnung und i versprich, dass i nia mehr für imma weggeh.“

Jetzt hod da Leo aa verstandn, dass se manche Sachan im Lebm ned ändern lassn und dass es am End vom Dog imma dunkel werd.

Hod dir da Artikel gfoin? Auf Facebook teiln Auf Instagram folgn

Mia san aa auf Instagram und Facebook

Neie Gschichtn, Bilder und Gaudi: gleich folgn und nix mehr verpassn.

Koarb
Nach oben scrollen