De Waldweihnacht

„Heier miassn mir aber ned wieder mit in de Kirch, oder?“, jammert de Maria, ois ihra Muatter grad de vierte Kerzn vom Adventskranz azündt hod, „Weihnachten is ja echt cool mit de Gschenke und dem Feiern, aber de muffige Kirch muass echt ned sei.“

„Wennst ned in d Kirch gehst, kriagst aa dei Gschenk ned vo mir“, hod ihr Großvater entgegnet, der se grad an Lebkuchen vom Tablett gnumma hod und genüsslich neibissn hod. „Heitzutag is Weihnachten sowieso nimma des, wos s amoi war: Früher war so vui Gschenke ned selbstverständlich und es is no mehr ums Beisammensei gangen. I ko teilweise verstehn, dass de Kirch ned da attraktivste Ort für euch junge Leid is, aber immerhin werd dort jedes Jahr dran erinnert, dass s an dem Dog um mehr geht ois bloß Gschenke und Party, unabhängig davo, ob ma gläubig is oder ned“, hod da Opa weiterpredigt und hod dabei probiert, möglichst verständnisvoll und zugleich weise zum klinga.

„Jaja, es geht drum, sei Herz zum öffna und so weiter, des woaß i doch“, hod de Maria daraufhin trotzig antwortet, „also zwingts mi wia jedes Jahr und i muass mitmacha, i hob s scho verstandn.“

Auf de Aussage hi hod de Muatter vo da Maria s Thema gwechselt, um de Stimmung wieder a bissl zum besänftign und an ruhign vierten Advent zum feiern.

De Familie hod no in ara kloan Siedlung am Land glebt, de trotzdem vo de Folgn vom modernen Lebm eingholt woan is: Überoi ham de vorbeigehenden Fußgänger grelle Werbelichter an de Straßn blendt und jeder Gartenbesitzer hod probiert, seinen Nachbarn mit da prunkvolleren Beleuchtung zum überbietn. De Menschn san bis zum 23. Dezember unter Druck gsetzt woan vo da wahnhaftn Vorstellung, in da Weihnachtszeit so vui Umsatz wia möglich zum erzeugn, schließlich war s Weihnachtsgschäft de profitabelste Zeit. Aber war s wirklich a guads Gschäft, de wertvolle Phase vom Jahr gegn hohe Umsatzzahln einzutauschn? Im Wohnzimmer vo da Familie hod no a Bild vo am viertn Advent aus da Nachkriegszeit ghängt, auf dem de Großeltern no ois kloane Kinda in Lumpn zum segn warn. Trotzdem hod des Foto a ganz bsondere Wärme ausgstrahlt, ma hod s kurze Glück in de Augn vo olle Personen spürn kenna.

So is in dera ganzn Hektik vo da modernen Zeit da Heiligabend nähergrückt, bis letztlich olle stressigen Vorweihnachtsfeiern in da Arbeit und in de Vereine abghakt warn und da erste freie Dog am Morgn vom 24. Dezember de Dorfbewohner durchschnaufa hod lassn. Es war a überaus kalter Morgn, denn obwoi s koan Schnee ghabt hod, ham de Wiesn und Wäider wia vereist gwirkt. Und wia durch an Zauber is im Dorf endlich a ruhige Stimmung eikehrt, de nach de letztn morgendlichen Einkäuf schließlich ihrn Weg in jedes Haus gfundn hod. Vui zu schnell is da Uhrzeiger im Wohnzimmer vo da Familie grennt, der sonst oft wia versteinert gwirkt hod. So is s langsam dunkel woan an oana vo de längstn Nächt vom Jahr.

De Familie hod se grad fertig macht für d Kirch und hod de letztn Vorbereitungen für a möglichst perfekte Bescherung erledigt: De Gartenbeleuchtung is no amoi aufs Maximum hochgfahrn woan, des Radio hod in perfekt ausgloter Lautstärke seine Weihnachtslieder trällert und auf dem Herd san scho zwoa große Heferl mit Punsch und Glühwein gstandn, während unterm strahlenden Weihnachtsbaam selber vui große Pakete auf ihre zugebn unspektakuläre Enthüllung gwart ham, denn jeder hod scho gwisst, wos er oder se vo de jeweils andern kriang werd.

Dann hod s urplötzlich an dumpfn Knall doa und ois is stockfinster woan im Haus. „Hallo?!“, hod d Mama durch den Treppnflur gschrien, „i glaub, des war zu vui Weihnachtsbeleuchtung im Garten, ko jemand de Sicherung wieder umschaltn?“

„Des war ned bloß bei uns“, hod da Papa aus dem genauso düsterna Wohnzimmer antwortet, „draußn bei de Nachbarn brennt aa koa oanziges Liacht mehr.“ Mittlerweile hod jeder in da Familie de Taschnlampn vom Smartphone eigschaltn und de Familie hod se im Flur versammelt, um se über de nächstn Schritte zum beraten.

„Also i bin scho fertig, wegn mir kenna mir direkt in d Kirch gehn, und wenn mir zruckkemma, werd da Strom scho wieder do sei“, hod de Maria vorgschlagn, woraufhin de andern zustimmend nickt ham. Also san s gmeinsam Richtung Dorfmitte ganga, wo de oide gotische Kirch mittn in da düsteren Weihnachtsnacht Wacht ghoitn hod. Und scheinbar war de Maria ned de Oanzige, de de Idee ghabt hod, in d Kirch zum gehn, denn vo olle Seitn ham de schwachen LED vo de Smartphones durch de Seitnstraßn glacht! Bei da Kirch ogkemma, is a lautes Geschnatter losganga, bei dem se noch a poar Sekundn rausgstellt hod, dass da Stromausfall wohl durch an Kabelbrand ausglöst woan is und des ganze Dorf über Weihnachten komplett ohne Strom sei werd.

Iatz is s unruhig woan, denn vui ham ihrn Weihnachtsabend und de kommenden Dog scho ins kloanste Detail durchplant ghabt. „Wos mach i denn iatz mit mein Festessn?“ hod ma do ghört, „Wia soin mir denn drei Dog ohne Heizn auskemma?“ hod s dort grunzt.

Plötzlich hod se a bärtiger Mo mit am grünen Jägerhut vor de Menschnmenge gstellt und mit lauter Stimm gruafa: „Olle amoi zuahörn, beruhigts eich a bissl! Es hod scho amoi oan gebn, der Weihnachten ned im Warmen bei festlichem Essn verbringa hod kenna, und de Person is sogar an so am Weihnachtsdog geborn woan: Ja genau, da Jesus selber is in ara kloan Krippn neben Küah und Schaf auf d Welt kemma! Also erinnern mir uns doch amoi, warum mir den Dog heit überhaupt feiern, und probiern mir s Beste aus da Situation zum macha. I bin Förster im Wald nur a poar hundert Meter vo do, i hob gnua Brennholz für a großes Lagerfeuer, ihr seids also olle herzlich eingladn, mit mir heit gmeinsam Weihnachten amoi anders zum feiern!“

Kurz war s an Moment stad, bis schließlich oana nach dem andern de Idee befürwortet hod. „I hob scho an riesign Bottich Glühwein gmacht, der reicht erstmal für a Aufwärmrundn“, hod a Frau in da Menge gsagt. „Wia war s, wenn jeder, der a Instrument spuin ko, des mitnimmt und mir mit Musi für a bissl Stimmung sorgn?“, hod a junges Madl vorgschlagn. So san immer mehr Ideen zsammkemma und es hod ned lang dauert, bis se olle Dorfbewohner im Wald versammelt ham. Und wia gmütlich war s jetzt do: De Menschn ham vui Bierbänk und Gartenmöbel aufgstellt, de Kinda ham den Christbaamschmuck mitgnumma und an olle Eckn an de Zweig ghängt, auf aufgstellte Baamstämm san helle Laternen mit großn Kerzn brennt und de Oidn ham de Jungen am Lagerfeuer vergessene Weihnachtsgschichtn erzählt. A provisorische Band hod bekannte Weihnachtslieder gspuit und mehr und mehr ham de Menschn ogfangt mitzsinga und de klare Weihnachtsnacht oafach nur zum genießn.

Ois de Musi für an kurzn Moment aufghört hod, hod da Pfarrer vo da kloan Siedlung de Aufmerksamkeit gnutzt und hod mit kräftiger Stimm zur Menge zum redn ogfangt: „Liebe Dorfbewohner, iatz will i an dem Heiligabend, der eigentlich mei liebster Arbeitsdog im ganzn Jahr is, doch no was predign: Jedes Jahr aufs Neie probier i de Leid dran zum erinnern, dass Weihnachten a Fest vo da Gemeinschaft is. Es geht gar ned so sehr drum, endlich a poar Dog frei zum ham oder de greßtn Gschenke zum kriang, sondern se drauf zum besinna, wos uns wirklich wichtig is. Wos war s Lebm schon ohne de gmeinsamen warmen Momente, de mir olle gleich feiern, de aber jeder doch anders wahrnimmt und fühlt? Umso wichtiger is es, dass mir de Zeit schätzn lerna und erkenna, dass s ned unbedingt erst de Anlässe braucht, um de Gfühle in uns hervorzurufa. Es is des Natürliche, Oafache, des für uns wahres Glück bedeit. Do im Wald is ois so simpel und bekannt, und doch hod uns heit olle a ganz bsonderer Zauber gfangen gnumma. Ja, ihr habts sogar vergessn, dass ihr olle no a Menge Gschenke hättats mitnehma kenna, aber i seh ned a oanziges Paket! Stattdessn hod jeder probiert zum gebn, um des anfangs schlechte Szenario so guad wia möglich werdn zum lassn. Und jeder vo eich hod dafür a Menge zruckkriagt! A so a schöner Abend is wohl des greßte Gschenk, des ma se selber, aber aa de andern macha ko. Es mog sei, dass ned jeder vo eich a gläubiger Christ, gschweige denn a fleißiger Kirchgänger is, aber des spuit aa koa Rolle, denn ihr habts den Glaubn mehr verstandn ois olle de, de bloß stumpf de Text auswendig lerna. Glaubn bedeit se de Dinge zum erdenka, de mir ned beweisn oder nachprüfa kenna. Mir ham koan Beweis dafür, dass des guad war, wos mir heit doa ham, aber mir fühln, dass s guad war. Vielleicht kimmt nia da Dog, an dem mir wirklich wissn, ob des so is, aber mir ham durch unsan Glaubn an Kompass dafür, wia mir lebn wolln. Ihr olle habts glaabt, dass des gmeinsame Feiern do am warmen Lagerfeuer bessa is, ois alloa dahoam im Dunkeln bei eiern Gschenke zum sitzn. Koaner hod an was anders glaabt und is dahoam bliem! Des bedeit, dass mir uns selber durch unsan unterbewussten Glaubn zoagt ham, wos uns wichtig is.

Sogar i, der se a Lebm lang mit dem kirchlichn Glaubn beschäftigt hod, hob heit wos dazuglernt: Es gibt koan vordefinierten Weg, für se selber Gott zum finden, ma ko eahm ned kennalerna in Biacha, sondern des, wos mir selber ois Gott empfinden, is imma in uns und um uns: in dera kaltn Nacht in ihra ganzn Schönheit, im Lacha vo uns olle, wenn mir oafach nur glücklich san, und in unserm Geist, der uns imma wieder an den Dog erinnern werd.

Deswegn dat i vorschlagn, dass mir ab sofort Weihnachten jedes Jahr do im Wald feiern, insofern da Förster einverstandn is. Ihr kennts nächstes Jahr aa ruhig Gschenke mitnehma, denn mir ham scho zoagt, dass mir iatz glernt ham, wos für uns s Wichtigste is! I wünsch eich a fröhliche, gsegnete Weihnacht!“

Nach dene Wort ham olle Menschn im Wald klatscht und manche ham sogar Tränen in de Augn ghabt. Und so hod de kloane Siedlung vo dem Dog an jedes Jahr ihr eigenes, ganz bsonderes Weihnachten im Wald gfeiert.

Hod dir da Artikel gfoin? Auf Facebook teiln Auf Instagram folgn

Mia san aa auf Instagram und Facebook

Neie Gschichtn, Bilder und Gaudi: gleich folgn und nix mehr verpassn.

Koarb
Nach oben scrollen