Da große Krieg

Mit am großn Knallen und Pfeifa is des neie Jahr begrüßt woan: De vergangenen 365 Dog san für de Mehrheit vo de Bürger mehr ois bloß erfolgreich gwen, und so san de strahlendstn Raketen aufgstiegn, um den Himme in a bunte Lichterwelt zum verwandeln. Es war nur schwer zum erkenna, welcher Nachbar de schönere Feuerwerkssalve in de Dunkelheit gschossn hod, um da eignen Selbstzufriedenheit aa nach außn Ausdruck zum verleihn.

De Lea war heier in de große Stadt kemma, um bei dem Spektakel mittn im Gschehn sei zum kenna und aa no a bissl Zeit mit ihrer oidn Großmuatter zum verbringa, de scho imma a kloane gmütliche Wohnung in da Innenstadt ghabt hod, vo da aus ma an wunderschönen Ausblick aufs Stadtpanorama ghabt hod. Es war imma interessant, vo da Oma zum erfahrn, wia de Sachan früher gwen san und wia de Menschn früher glebt ham.

„Oma, du hast den großn Krieg damals miterlebt, wos hod Silvester damals für di bedeit?“, hod de Lea gspannt gfragt, denn es hod a gewaltiger Unterschied sei miassn, den Jahreswechsel in Wohlstand und Sicherheit zum verbringa oder in Angst und Armut.

„Na mei Kind“, hod de Großmuatter mit nachdenklichem Blick antwortet, „gwiss san mir ned auf de Idee kemma, no zusätzlich zu de Bombenabwürf weitere Explosionen zum verursacha. Wenn i de zwoa Zeitn vergleich, so bin i natürlich glücklich drüber, heit nimma um mei Lebm zum fürchtn, allerdings empfind i aa Traurigkeit, vermiss i doch a poar Sachan aus dera schwern Zeit.“

De Lea war a wenig perplex, denn wos sollt da Oma denn fehln in ara Welt, in da s eana scheinbar an nix gfehlt hod? „Des muasst mir genauer erklärn, bist ned glücklich drüber, dass de Zeitn vom Krieg mit olle ihre Schrecken endlich vorbei san?“, hod de Lea gfragt und hod zu ihra Großmuatter rübergschaut. De Oma dagegn hod gedankenversunken auf de große Kirchturmuhr gstarrt, de mittlerweile fast scho de erste Stund vom neien Jahr gschlagn hod, ois s mit kratziger Stimm antwortet hod: „Du hast recht, es is mit Sicherheit a Segn, dass weltweit Frieden zwischen de oanzelnen Länder herrscht. Des bedeit aber ned, dass de Zeitn vom Krieg vorbei san, schau di nur um in da Welt: Heit wütet da Hass im Zwischenmenschlichn. Egal ob Syrien, Venezuela oder Libyen: olle de Konflikte san Bürgerkriege oder ham zumindest ois innere Konflikte ogfangt. Aber ned bloß weit weg vo Europa tobt a Gfühlskäite, schau owi in de Straßn vo da Stadt: Jeder will bloß den andern überbietn mit dem prächtigstn Silvester-Feuerwerk und da schönstn Weihnachtsdekoration. Es is da Neid auf den Nächstn und de Angst, ma selber kannt vo de andern abghängt werdn. Wann war unsere Gsellschaft jemois so gspaltn wia in dera kaltn Zeit? Ham mir uns ned vor 30 Jahr no mit freudigem Herzn de Händ greicht zur friedlichn Wiedervereinigung?

Überoi auf de Straßn und in de Medien werd aufgstachelt und gegnananda ausgspuit: da Deitsche gegn den Ausländer, da Bayer gegn den Preißn, de Städter gegn de Landbevölkerung, da Reiche gegn den Armen, da Handwerker gegn de Akademiker, de Oidn gegn de Jungen, da Mo gegn de Frau. Wer werd ned ogheizt, auf den Nächstn nundazutretn? Derweil san de schönstn Eigenschaftn, de uns Menschn ausmachan, da Zsammhoit, des Knüpfa vo Freindschaftn und da Austausch miteinander. Mir soitn wieder mehr miteinander redn ois übereinander. Mir lassn uns Lügn aufbinda vo Schlangan, de uns gegnananda aufbringa wolln, bloß um ihre eigene erbärmliche Macht zum sichern.

Mir ham damals den bis jetzt bitterlichstn Krieg vo da Menschheitsgschicht ghabt, des stimmt. Und obgleich jede Explosion den Tod bedeitn hod kenna, war s doch ehrlich. De heitigen Raketen flüstern nur ganz leise: „I bin greßer ois du.“ Mir ham damals bloß a kloans Feuer für an ganzn Wohnblock ghabt, so knapp war s Brennholz. Aber es is scho warm woan, wenn olle zsamm in am großn Raum gstandn san und in stillm Hoffa de schöne Flamme beobachtet ham. Mir ham koa bessa und schlechter kennt, sonst war wohl jeder oansam für se alloa verendet.

Wia oft hear i heitzutag, wia gleich mir doch olle san, und doch werd da kloanste Unterschied ois Anlass benutzt, se selber ja bloß bessa zum stelln ois den andern. Is s ned schee, dass mir olle verschiedn san? Kenna mir ned wieder mit neigierige Kinderaugn versuacha zum verstehn, wos de andern bewegt und beseelt? Warum kenna mir ned gmeinsam verschiedn sei, statt olle gleich oansam und armselig?

Lass doch de Menschn stolz auf ihr Land sei, solang s neamd andern verletzn. Vielleicht entdeckn mir mehr Gmeinsamkeitn, ois mir dacht ham. Lass doch de Leid ihre ganz eigenen Bsonderheitn und Traditionen, des macht doch de Welt interessant und liebenswert. Lass doch de Städter wia muntere Ameisn miteinander aufblühn, während am Land de frische Luft vo da Natur de Geister erfrischt. Lass den Reichen segn, dass Geld alloa ned zum Glücklichmacha taugt. Vielleicht tauscht er mim Armen a poar Groschn gegn des Gheimnis, trotzdem des Lebm zum liebn. Lass den Handwerker und den Akademiker wissn, dass ihre Arbeit alloa so nutzlos is wia a Körper ohne Hirn. Lass de Oidn erzähln vo früher, damit de Jungen lerna kenna. Vielleicht macha de Jungen de Oidn a Freid, wenn s bloß segn, wia ihr Werk weitergführt werd. Lass jeden Mo und jede Frau so lebn, wia s san! So verschiedn mir oft san, so schee ergänzn mir uns im Miteinander. I für mein Toal kannt ned glücklicher sei, ois mit dir gmeinsam heit a hoffentlich guads neies Jahr zum begin. I hoff, heier kenna mir dazu beitragn, de Welt a Stückl friedlicher zum macha.“

In dem Moment, ois de Oma ihrn letztn Satz beendet ghabt hod, hod de Lea bemerkt, dass s jetzt ganz leise woan war. Nur vereinzelt hod ma no den dünna Schweif vo ara weit entfernten Silvesterrakete in da dunklen Nacht vom neien Jahr verschwindn gseng. De dunklen Wolkn san aufeinander zuaflogn und san unter dem helln Liacht vom Mond verschmolzn. Und ois de Lea de warme Hand vo ihra Großmuatter gnumma hod, hod s gseng, wia de mit am zfriedenen Lächeln in den ruhign Horizont gschaut hod.

Hod dir da Artikel gfoin? Auf Facebook teiln Auf Instagram folgn

Mia san aa auf Instagram und Facebook

Neie Gschichtn, Bilder und Gaudi: gleich folgn und nix mehr verpassn.

Koarb
Nach oben scrollen