Höhlengleichnis 2.0

Wos war, wenn mir amoi de Realität, de echte Wahrheit erkennatn? Warn mir de als solche anerkennen, oder warn mir uns so sehr davor fürchtn, dass mir wieder zruck in unsere dunkle Höhln kriachn und dort weiterhin auf Schattn an da Wand starrn, de mir bis dahin ois Realität ogsegn ham?

De philosophische Frog hod da große Platon mit seim berühmtn „Höhlengleichnis“ scho vor etwa 2400 Jahr zeichnet, aber des Gleichnis erfährt für unsere Zeit a bedeutende Wendung, de aa so ähnlich im Film „Matrix“ abbildet woan is. So is de Realität nimma unbedingt de objektiv positivere Welt, sondern ko im Vergleich zur Scheinwelt sogar vui schlechter sei. In da „Matrix“ lebn de Menschn in ara modernen Zivilisation mit olle ihre Annehmlichkeitn und Nachteile, während de dort zoagte „echte Welt“ total verkommen aus de Überreste vo ara zerstörtn Umwelt bestäht.

Wars da Film 1999 no a Dystopie, so kimmt des vom Mark Zuckerberg letztes Jahr prophezeite „Metaverse“ dem Szenario scho an ganzn Schritt näher. Im Metaverse soll es möglich sei, über Virtual Reality in a Welt zu entschwindn, de de jeweilign Wunschvorstellungen entspricht. Denkbar warn do also virtuelle Reisn in andere Länder, in dene ma dann für a poar Euro auf da Couch in de teuerstn Luxushotels absteigt und am Strand entspannt. Oder ma trifft si mit ara Freundin nimma in da öden Realität im winzign 1-Zimmer-Apartment auf a Glas Wei, sondern verabredet si virtuell in am Märchenschloss.

Es soll also de Macht vo da Suggestion gnutzt werdn, um de Menschn in de vom Platon postulierte Höhln zu leitn. Dass des prinzipiell funktioniern ko, zoang de Scheinweltn vo de sogenanntn Gamer mit immer realistischere Spielumgebungn und de sozialn Netzwerke wia Instagram, auf dene se scho jetzt ihrm Umfeld a Lebm vorgaukeln, des se eigentlich ned führn.

Auf de Art lassn si de subtilen psychischn Störungen substituiern, de vor allem de jüngste Generation als Folge vo fehlender echter sozialer Interaktion erleidn muass. In da „echtn Welt“ a Mobbingopfer, Loser oder vom Hamsterrad ausbrennt, bietet des „Metaverse“ de Flucht in a erträglichers Dasein, vielleicht sogar in a erstrebenswerts Dasein.

Es is davon auszugeh, dass si vor allem bei fragile Charaktere a Sucht einstelln werd, de tatsächlich mit Drogenabhängigkeit vergleichbar is: Aa do werd da Psyche a anders Ich vorgaukelt, des aber immer wieder neu initiiert werdn muass. Nachhaltiger war es, des wirkliche Lebm entsprechend zu ändern, aa wenn des weder de Gewinnabsicht vom Silicon Valley erfüllt no oafach is.

Wos wär also de Motivation, de vielleicht unattraktivere Realität trotzdem anzuerkenna und si bewusst gegn de „Höhln“ zu entscheidn?

Für mi is des tatsächlich da Sog vo da Wahrheit, der mi instinktiv gegn de Lebenslüg stellt. Doa Menschn ned deswegn des, wos se doa, weil se denka, es war des Richtige und Wahrhaftige? Bloß Verzweifelte entscheidn si für an unrechtn Weg: Egal, ob i wegn Geldsorgn a Bank ausraub oder mi aufgrund vo ara Depression ins „Metaverse“ flücht, in beide Fäll bin i mir bewusst, dass mei Handeln ned richtig is.

Ganz abgsegn davon, dass de digitale Welt nia olle Facettn vo da Natur ersetzn ko: Selbst wenn mir uns a Video vo am Woid o’schaun oder meinetwegn mit ara VR-Brilln de Illusion ham, tatsächlich in am Woid zu sei, werdn uns immer de oan oder andern Aspekte fehlen, denn letztendlich interagiern olle Lebewesn mit ihra Umgebung. Aus dera Resonanz entstehn Gfühle und Eindrück, de mir mit da Digitalisierung nia reproduziern kenna, und sei es bloß de Gewissheit, trotz Müdigkeit doch no rausgangan zu sei.

Wer war 2020 ned froh, ois er seine Familie und Freind nach oanige Wochn Videokonferenz endlich wieder „in echt“ gsegn hod? Des Lebm bietet uns unglaublich vui, mir miassn nur bereit sei, es aa vo eam zu verlangen.

Vor meim höchstn Berg steh i und vor meiner längstn Wanderung: drum muass i erst tiefer owi, ois i jemois gstiegn bin: – tiefer owi in den Schmerz, ois i jemois gstiegn bin, bis eini in seine schwärzeste Fluat! So will es mei Schicksal: Wohlan! I bin bereit.

De Zeiln stehn in Nietzsches Zarathustra und i find, dass se des Lebm an si sehr guad beschreibn: Mit wenig Einsatz werd de Belohnung in da Regel aa entsprechend gring sei. Des Glücksgfui nach am Marathon is greßer ois auf am Laufband 5 Kilometer zu absolviern. De digitale Welt soitn mir bloß dann nutzn, wenn des Ergebnis für uns des Gleiche is. Wolln mir an Freind kontaktiern, so mog a Whatsapp-Nachricht a probats Mittl sei, a echts Treffn dagegn endet im Gegnsatz zu am Videochat fast immer mit am „des soitn mir vui öfter macha“.

Entscheidn mir uns also für des Lebm außerhalb vo da Höhln, aa wenn mir de aus Interesse natürlich gern amoi für oanige Minutn betretn kenna.

Hod dir da Artikel gfoin? Auf Facebook teiln Auf Instagram folgn

Mia san aa auf Instagram und Facebook

Neie Gschichtn, Bilder und Gaudi: gleich folgn und nix mehr verpassn.

Koarb
Nach oben scrollen