Da Froschkönig vom Zauberwoid

Wer geht ned gern durch an magischn, verzauberten Woid? Des grün schimmernde Moos, des se über de riesign Wurzeln vo de oidn Bäum glegt hod, lasst jeden Träumer kurz eintauchen in a andere, längst vergangene Welt.

Und ned bloß geheimnisvolle Pflanzn schlängeln se durchs Gestrüpp am See nahe vom Zauberwoid, aa unzählige Viecher verstecka se vor de Augn vom neigierign Menschn und lebn ganz unter se. So erzählt ma se, dass des wohl bekannteste Viech vom Zauberwoid da Froschkönig sei soll, weil der im Woid und im See jedes andere Viech kennt und gschätzt hod.

Und obwohl da Froschkönig so beliebt war, war er trotzdem ned glücklich, weil er se so sehr a Königin gwünscht hod.

So hod er an am Dog a Reh gfragt, ob s ned mit eam ausgehn mecht. Des Reh hod se riesig gfreit, denn welche Dame will ned vo am König ausgführt werdn?

Da Froschkönig und des Reh san vergnügt durch den Zauberwoid gsprungen, ois auf amoi des Reh aus Versehn ganz knapp sei Bein neben den Frosch gstampft hod. „Es-es dad mir load“, hod des Reh gstammelt, „aber mir passn wohl ned zam. I bin vui greßer ois du und miassat imma Angst ham, dass i di ned an am Dog oafach zerquetsch. I denk, du muasst da wen andern suacha.“

Oh, wia traurig war da Froschkönig in dem Moment! Enttäuscht is er weiter zum See zogn und is auf de Seerosnblattl umanandgsprungen, ois eam auf amoi a hübsche Forellendame aufgfoin is, de im freudig im Wasser hi und her gschwommen is. Da Froschkönig hod seinen Muat zsammgnumma und hod nomoi gfragt, ob de Forellendame mit eam ausgehn mecht. De Forellendame hod se riesig gfreit, denn welche Dame will ned vo am König ausgführt werdn?

Da Froschkönig und de Forelle san lang durch den See gschwommen, ois auf amoi beide Hunger kriagt ham. „Jetzt a poar Mückn essn, des war doch wos!“, hod da Froschkönig vorgschlagn und se vor Appetit de Lefzn gleckt. De Forellendame hod an traurign Blick aufgsetzt und antwortet: „Es-es dad mir load, liaber Froschkönig, aber mir passn wohl ned zam. Wia soll i ois Fisch denn Mückn essn, i ko doch ned amoi an Land gehn? Unser ganzes Lebm lang miassatn mir im Wasser zsammlebn, i fürcht, du muasst da wohl wen andern suacha.“

Wieder war da Froschkönig am Bodn zerstört: Wos macht er denn bloß falsch? Er hod doch oafach bloß glücklich sei und a Partnerin findn wolln! So is er vom See wieder ans Ufer gsprungen und is durch de Wiesn vorm See gstreift, ois auf amoi a wunderschöne Schmetterlingsdame auf eam zuagflogn is. Da Froschkönig hod se erinnert, dass aa Schmetterlinge Mückn gessn ham, und hod se denkt, dass es jetzt endlich klappn müassat mit da Liab, so hod er zum letztn Moi gfragt, ob de Schmetterlingsdame mit eam ausgehn tat. De Schmetterlingsdame hod se riesig gfreit, denn welche Dame will ned vo am König ausgführt werdn?

So san beide durch de Wiesn vom Zauberwoid zogn und ham vergnügt Mückn gjagt, bis beide pappsatt warn. „Des war vielleicht a guads Essn!“, hod se de Schmetterlingsdame gfreit, „Jetzt bin i aber todmüad, kimmst mit mir mit nauf zum Astloch vom oidn Baam?“

Oh na! Da Froschkönig hod zwar wirklich hoch springa kenna, aber auf Bäum kraxln hod er ned kenna. „Es-es dad mir load, liaber Froschkönig, aber mir passn wohl ned zam“, hod de Schmetterlingsdame gsagt, „Du kost ned fliagn und i ko ned schwimma, wia sollma so a ganzes Lebm zsamm sei? Du muasst da wohl wen andern suacha!“

Jetzt hod da Froschkönig koa Energie mehr ghabt: Traurig hod er se ans Seeufer auf a Seerosnblattl ghockt und hod bitterlich ogfangt zum woana. De Sonn is in dem Moment grod untergangen und hod se langsam in ihre scheena dunkelroten Farbn über den Zauberwoid gsenkt.

„Warum woanst denn?“, is auf amoi a freundliche Stimm ertönt. Da Froschkönig hod se umdraht und hod seine Augn ned traut: Vor eam auf dem Seerosnblattl is a wunderschöne Froschdame gsessn und hod den Froschkönig oglächelt.

„Es-es geht scho wieder“, hod da Froschkönig überrascht gstammelt und hod de wunderbarn grünen Augn vo da Froschdame bestaunt, „I-i hob di no nia do gseng, dabei wohn i scho mei ganzes Lebm im Zauberwoid.“

„I bin aa erst heit okemma, da Woid, aus dem i kimm, is abgholzt woan und so bin i weitergzogn, um do mei Glück zum findn.“

„So-soll i di a wenig rumführn? I kenn do jeden Fleck!“, hod da Froschkönig vorgschlagn und hod vor Freid gstrahlt.

„Gern, welche Froschdame will ned vo am Froschkönig ausgführt werdn?“, hod de Fröschin glächelt, und beide san losgsprungen, um den wunderbarn Zaubersee zum erkunden. Ois, wos de zwoa gmacht ham, hod eana unheimlich Spaß gmacht: Se san über de Seerosnblattl ghupft, durch den See gschwommen, durch den Zauberwoid ghupft und über de Wiesn und ham so vergnügt quakt, dass es olle andern Viecher a wahre Freid gwen is.

Wer also jemois durch den Zauberwoid geht, der erinnert se an den Froschkönig, der mit vui Geduld am End doch no seine Froschkönigin gfundn hod. Und no heit ko ma mit a bissl Glück de zwoa abends am Seeufer beim Zauberwoid quaken hearn.

Hod dir da Artikel gfoin? Auf Facebook teiln Auf Instagram folgn

Mia san aa auf Instagram und Facebook

Neie Gschichtn, Bilder und Gaudi: gleich folgn und nix mehr verpassn.

Koarb
Nach oben scrollen