Wertegemeinschaftn

Vor oanige Jahr hob i mi selber immer als „patriotisch“ bezeichnet, sogar als „nationalistisch“, soweit damit ned de Abwertung vo andere Nationen oder Völker gmoant is. Mittlerweile hod si mei Sichtweis darauf a bissl gändert, weil diese Einteilungen und de Folgen draus für de Menschheit fast immer fatal san, wos i im Folgenden genauer erklärn mog.

Da entscheidende Punkt vo meim Blickwechsel war de Frag, warum olle Elemente, de in ihrn Aktionen immer und ständig gegn des „Deitsche“ (bzw. „Nationale“ in andere Länder) warn, des rechtliche Konstrukt vo da Bundesrepublik doch ned abschaffa wolltn. Warum werdn offene Grenzn gfordert, aber ned de Auflösung vo olle Nationalstaatn?

De Antwort is, dass de Nationen vo verschiedene Kräfte braucht werdn, um Konflikte zu schaffa und den Menschn an seiner Entfaltung zu hindern. Wenn ma in de Gschicht schaut, lernt ma, dass de Kriege vo da Menschheit umso brutaler und weitläufiger warn, je mehr es tatsächlich um de „Interessen“ vo Nationen ganga is.

Vor allem mir als Deitsche ham a sehr traumatische Beziehung zum Konstrukt vo da Nation: Am Anfang bei da Reichsgründung 1871 a Garant für Sicherheit und Frieden und Erfüllung vo da Sehnsucht nach ara Einheit vo de Deitschn, hod si da Begriff „Deutschland“ schließlich zu uns erklärter Erbsünd gwandelt. In politische Diskussionen trifft ma selten auf jemand, der si ned nach kurzer Zeit auf oane vo dene zwoa Sichtweisn schlogt.

Aber warum san Nationen damois überhaupt begründt woan? Zum unterscheidn san de erstmoi vom Begriff vo am Volk: a weitestgehend homogene Masse erkennt Gemeinsamkeitn, de a schnelle Zugehörigkeit zu ara Gruppn ermöglichn. Wia i a halbs Jahr in Russland studiert hob, war es immer schö, zwischendurch jemand Deitsch redn zu hearn, und so hod ma si sofort verbundn gfühlt, ohne anander zu kenna. Zur Zeit vo da Entstehung vo da Idee vom Nationalstaat is diese Identität praktisch gnutzt woan, um Sicherheit und Wohlstand zu begründa. Wenn ma also de zwoa Aspekte untersucht, ko ma beweisn, ob a Nation no ihrn ursprünglichn Zweck erfüllt.

De Garantie für Sicherheit is heit obsolet, weil ned de Zahl vo de Soldatn und deren Ausrüstung für an theoretischn Krieg entscheidend is. Vielmehr kannt mit Massenvernichtungswaffn und moderner Technik aa a kloans Land mit wenig Einwohner gegn a großes Land bestehn. De Atomwaffn, Cyberkriege und Drohnenangriffe san bloß a poar Schlagwörter, um deitlich zu macha, wia unbedeutend da oanzelne Mensch in dera Frag woan is. Aber aa Wohlstand werd ned mehr vo ara Nation sichergstellt, sondern in Oanzelfäll sogar behindert. De Infrastruktur vo Deutschland tät si aa nach da Auflösung vo ara förmlichn Nation im Prinzip erhaltn, und staatliche Regulierungen samt Steuern und a aufgeblähts Sozialsystem vernichtn sogar no Wohlstand. De multinationaln Konzerne kümmern si sowieso ned um nationale Beschränkungen, sodass es eigentlich a Farce is, den Bürger mit solche zu gängln.

Wia tät si also de Welt ändern, wenn de Nationalstaatn aufglöst warn? Gewiss miassatn wirtschaftliche Abkommen gregelt werdn, wobei oanerseits da generelle Freihandel a Option wär und si andererseits de Warenbewegungen durch de Globalisierung eingpendelt ham. De san entweder im Fall vo Ausbeutung oder Umweltschädigung sowieso moralisch zu überdenka oder stelln an gsundn Tausch vo Produkte dar, der auf beide Seitn den Wohlstand erhöht.

Da wohl kritischste Aspekt vo dera Betrachtung is de Globalisierung, de durch ihre Abhängigkeitn den „kloan“ Bürger immer wieder erpresst und in a propagierte Verantwortlichkeit zwängt. Verhoit si a Staat neutral, so is er verantwortungslos, ansonstn muass für etwaige Folgen wiederum da unmündige Bürger aufkemma, der stets in Sippenhaft gnommen werd.

De Vergangenheit hod außerdem zoagt, dass Staatn zur Abrüstung ned fähig san, wos zu ara permanentn Unsicherheit führt, de zwar ohne Nationen wohl aa denkbar wär, si durch de vui kloanern Kreis aber ned in da gsamtn Welt entfachn tät. Wen tät a Streit zwischen zwoa Dörfer am andern End vo da Welt scho stören (nebn da Vermutung, dass des sowieso täglich vorkimmt, ohne dass mir des mitkriagn)?

Zwar mog da Einwand kemma, dass si sicherlich ned olle Staatn vo da Welt gleichzeitig auflösn warn und oanige damit a Übermacht hätt, aber vor allem de neieren Kriege und Konflikte san genau wia zuletzt in da Ukraine dadurch zustande kemma, dass a Staat in irgendara Form ned deckungsgleich mit seiner Bevölkerung war. Tschechoslowakei, Jugoslawien, Moldawien und vui mehr: hätt ma de Konflikte ohne Nationen verhindern kenna?

Dabei miassn de positivn Sachan vo ara Nation ned aufgebn werdn, sondern kennan als verbindende Brückn zwischen verschiedene Gemeinschaftn dienan: Warum soit ned in Kulturen oder Mentalitätn dacht werdn? Gemeinschaftn tatn dann in ihrer Gemeinsamkeit Festl feiern, anstatt in ihrer Gegnseitigkeit untereinander Konflikte zu schürn.

Des warn dann wirkliche Wertegemeinschaftn, ned aufzwungene Lippenbekenntnisse wia de Zugehörigkeit zur Nato oder EU. So wia si de Bayern also mit de Österreicher verbundn fühln, ohne selber a eigene Nation zu sei, so kunntn olle denkbarn Gemeinschaftn ungezwungene Symbiosen eingeh, de eben wega ihrer Ungezwungenheit bloß Positivs schaffa kennan. Vielleicht tät si aa a gsunde Konkurrenz herausbilden, bei da jeder bestrebt is, seine eigene Identität zu verfeinern. Schopenhauer hod des in dera Hinsicht treffend beschriebn, wia er moant hod, dass si bloß Taugenichtse immer auf ihre Nation berufn, weil sie selber zu koana Leistung fähig oder zu faul dazu san. Dieser Wettbewerbsgedanke is es doch aa, der sportliche Wettkämpfe immer so interessant gmacht hod, und der zunehmend an Bedeutung und Spannung verliert, genau im selbn Maß wia a Reise in a anders Land immer mehr da eigenen Herkunft gleicht. Wer reist denn allen Ernstes in a fremds Land, wenn er am End bei MC-Donalds isst und seine Zeit in am Hilton-Hotel am Smartphone vergeudet?

I für mein Teil bin bereit, selber wieder auf de Suach zu gehn nach dem, wos mi eigentlich ausmacht: in welcher Gemeinschaft mog i lebn, wo fühl i mi aufghobn, wo ko i mein Beitrag leistn? I hob außerdem festgstellt, dass i aa koane Unterscheidung vornehma mog, ob i Bayer oder Deitscher bin, denn i bin beides und mog mein Teil dazu beitrogn, de für mi als Wertegemeinschaftn zu begreifendn Kulturen zu lebn und weiterzuentwickeln. A Nation braucht ma dafür ned, sehr wohl aber des Bewusstsein, si ned im Namen vo derer weiter schröpfa zu lassn.

Mir is bewusst, dass mei Ansatz a komplett neie Denkweis is, aber des gegenteilige war des aa vor 200 Jahr, wo a Mensch aus dem Süden no überhaupt koa Vorstellung ghabt hod, warum er auf amoi mit am völlig fremdn Menschn aus dem Norden a imaginäre Einheit bilden soit. Letztendlich san de Folgen ausschlaggebend dafür, wia mir als Menschn handeln und lebn soitn, und da Versuch vo da Befriedung vo da Menschheit soit a erstrebenswertes Ziel für a neie Denkweis sei.

Hod dir da Artikel gfoin? Auf Facebook teiln Auf Instagram folgn

Mia san aa auf Instagram und Facebook

Neie Gschichtn, Bilder und Gaudi: gleich folgn und nix mehr verpassn.

Koarb
Nach oben scrollen