Da Schläfer

Erschrocken hod d Michaela den Anruf vo da Intensivklinik angnomma, Hoffnung und Angst ham in dem Moment an grausamen Kampf in ihra Brust ausgfochtn: Endlich gabs zumindest Neuigkeitn vo ihrm Mo, der si jetzt scho seit über 8 Jahr im Koma befundn hod.

Da 09.11.2013 hod ihr Lebm komplett verändert, des Datum hod se si auf ihrn Fuaß tätowiern lassn mit dem Versprechn, trotzdem bis zum End an da Seitn vom Stefan zu bleibn. Immer wieder de enttäuschende Nachricht, dass si nix an seim Zustand gändert hod: Angschlossn an Schläuch is er künstlich ernährt woan und de Ärzte ham bloß a gringe Chance vo 5% eingräumt, dass doch no amoi des Wunder gschiaght und da Mo vo da Michaela aus dem ewign Schlaf aufwacht.

Es war de Woch vor Weihnachtn im Jahr 2021 und d Michaela war grad dabei, ihre Wohnung für si und ihre Kinda zu dekoriern, wia ihr Handy ihr Herz zum Klopfa bracht hod.

„Griaß Eahna, Frau Huber“, is a kratzade Stimm am andern End vo da Leitung erklungan, „Doktor Brandwein hier am Apparat.“

D Michaela hod tief Luft gholt, innerlich scho drauf vorbereitet, erneut de bittere Absag entgegnzunehma, wia de Tonlage vom Doktor auf amoi höher woan is: „Mir ham wirklich koane Erklärung dafür, wos heit passiert is, aber i derf Eahna voller Freid Eahnas persönliches Weihnachtswunder verkündn: Eahna Mo is heit Vormittag aus dem Koma aufgwacht, es geht eam guad und es schaut so aus, wia wenn er oafach bloß de ganzen Jahr gschlafn hätt! Mir ham ois überprüft und koane Bedenkn, dass Sie Eahnan Mo no heit abhoin kenna. I geh davon aus, dass Sie heuer ganz guad mit meim Anruf lebn kenna, und freu mi auf Eahan Besuch glei.“

D Michaela hod a unbeschreibliches Gfui durchströmt: ihr is hoaß und koit zugleich woan, laut hod se vor Freid durchs gsamte Wohnhaus gschrien und hod sofort ois stehn und lieng lassn. Sie hod si während da Fahrt zur Klinik ned vorstelln kenna, dass si scho jemois a Mensch so auf an Moment gfreit hod wia sie grad, sie hod des Radio mit de nervign Weihnachtslieder auf Anschlag aufdreht, de Fenster owagmacht und de eiskoite Dezemberluft in vollen Zügn gnossn.

Wia tät ihr Mo wohl redn? Wos tät er für Gedankn ham? Ob er si no an ois erinnern kennat? Kurz hod d Michaela Zweifl ghabt, dass ihr Stefan se gar nimma wiedererkenna tät, aber dann is ihr wieder eigfalln, dass de Ärzte koan Mangl festlegn hom kenna. Ihr Mo hod sowieso immer an bemerkenswerten Dialekt ghabt, ohne dass er damit angebn hod, er war sanftmütig und hod immer versucht, a möglichst versöhnliche Atmosphäre zu schaffa. Ob er de Welt überhaupt wiedererkennt? Immerhin war vui passiert in de letzten Jahr, ois war irgendwie a bissl aus de Fugn grotn und in wenige Wochn hod si mehr gändert wia früher in oanige Jahr.

Hektisch is d Michaela in den Empfang vo da Intensivstation gstürmt, wia se wia aus olle Wolkn gfalln is: Da Stefan is lächelnd am Eingang gstandn und hod scho auf se gwart, so unscheinbar und selbstverständlich, wia wenn er si bloß kurz an Schokoriegel am Automatn gholt hätt. Olle zwoa san si in de Arm gfalln und ham vor Freid zum Woana ogfanga. Für d Michaela hod si ois Weh vo de letzten Jahr in dem Moment in an unbeschreiblichn Rausch aus Glücksgfühle verwandelt, mit dem se nebn am Stefan am liabstn no de ganze Welt umarmt hätt.

„Des hert si jetzt vielleicht verrückt o, aber i tät jetzt am liabstn zu unserm Lieblingsitaliener, bevor du mir ois erzählst, i war seit ara gfühlten Ewigkeit nimma dort“, hod da Stefan lacht mit am freidigen Blick in de Aung.

„Des wär aa mei Idee gwen“, hod d Michaela gantwort und hod an Kopf a bissl gsenkt, „leider is des zurzeit aber nimma so oafach. Es is so, dass es a neiartigs Virus gibt und bloß de in a Restaurant kenna, de dageng gimpft san. Des mit dem Virus is a ziemlich lange Gschicht, aber jedenfalls kenna mir für heit maximal a Pizza mit hoamnehma, weil du ja no ned gimpft bist.“

Da Stefan hod a bissl skeptisch gschaut, hod aber dann dem Alternativvorschlag zuagstimmt und hod auf da Fahrt vo da Michaela im Schnelldurchlauf a Menge über des Coronavirus, Varianten, Inzidenzen und sämtliche Schlagwörter erfahrn, de jeden andern Menschn auf da Welt wohl zu Recht unbändig gnervt hättn. Es hod aber tatsächlich was vo am Alptraum ghabt, wia da Stefan überoi auf de Stroßn Menschn mit Maskn umanandgehn gsegn hod.

„Wieso gehn de Menschn denn überhaupt de ganze Zeit no naus, wenn des neie Virus so gfährlich is, dass zwingend a Maske vorgschriebn is? Und warum werdn de ausgrenzt, de si gegn de neie Impf-Methode entschiedn ham? Oder san de Menschn mit de Maskn olle Leit ohne Impfung?“, hod da Stefan seine Frau mit verwirrter Mimik gfrogt.

„Hör amoi, des is ned so oafach zum erklärn, eigentlich is mir des aa a bissl unangenehm, über olle de Dinge zu redn. I hob mi ehrlich gsagt scho so dran gwöhnt, dass es für mi normal woan is. Ma zieht de Maske auf und fertig, des is ja ned so schlimm, wenn i dadurch jemand schützn ko, oder?“, hod d Michaela a bissl gnervt gantwort. Sie hod scho lang koane Diskussion drüber zuaglassn, weil solche Diskussionen meistens eher zu Streit gführt ham, aber ihrm Ehemo hod se de Fragn natürlich aa ned verwehrn kenna.

Aa da Stefan hod wohl gspürt, dass a solche Diskussion irgendwie an faden Beigschmack ghabt hod, und hod versucht, des Thema zu wechseln.

„Na guad, nacha erzähl ma wenigstens, wia es so in da Welt, in Europa weitergangan is! Wos hod si do so doa?“ Und wieder hod d Michaela a ganze Menge vo Bankenrettungen, vom Austritt vo de Briten aus da EU, vo da angspannten Lage gegenüber Russland seit 2014, vo de Migrantenströme, vo da Klimadebatte und vo da politischn Extremisierung in de Lager links und rechts erzählt.

Da Stefan hod erschlogn gwirkt vo da Großzahl vo de Themen, de wia in ara planten Abfolge auf de Welt eingprasselt warn.

„Des is ja Wahnsinn, mir kimmt es vor, wia wenn i 50 Jahr im Koma glegn wär. Warum hod si Deutschland überhaupt in so vui Themen eingmischt? Hamma ned neutral bleibn wolln? So wia du es erzählst, hert es si o, wia wenn mir zwunga warn, zu jeder politischn Frog Stellung zu beziehn. Kenna mir es grad wegn unserer Vergangenheit macha wia d Schweiz?“, hod si da Stefan mit fragendm Blick gäußert.

„Jo mei, mir san a vui greßers Land, mir miassn doch aa irgendwie Verantwortung übernehma. Außerdem is aa do schwierig, wos zu song, weil ma nia woaß, welche Meinung da andere dazu hod“, hod d Michaela entgegnet.

„Und übernehma mir aa de Verantwortung für de Folgen, dass mir uns überoi einmischn? Drüber soit ma zumindest diskutiern derfa, find i, umso schlimmer is es, wenn ma wirklich so vui Angst vor da Meinung vo de andern ham muass. Mir Menschn ham doch dafür a Sprach, damit mir uns austauschn und unsern eigenen Standpunkt überdenka kenna. Und wos mach i, wenn i koane Meinung zu am bestimmtn Thema hob? I hob 9 Jahr oafach verschlafn, Micha, wia tatn denn de Leit reagiern, wenn i oafach überhaupt nix über manche Dinge woaß?“, hod da Stefan in den Raum gstellt, woraufhin sei Frau nachdenklich woan is und kurz überlegt hod.

„Wahrscheinlich tatn di de Menschn für dumm haltn, denn eigentlich werdn olle de Dinge so oft in de Medien zoagt, dass ma goar koane andere Wahl hod, als si damit zu beschäftign. Woaßt, de Technik hod an riesign Sprung gmacht: Obwohl scho 2013 vui soziale Netzwerke existiert ham, hod de Dynamik nomoi a ganzes Stückl zuagnomma. Über de Massenmedien informiern si de Leit stündlich über olle Vorkommnisse in da Welt, es gibt überoi Artikel und Kommentare zu so guad wia olle politischn und gsellschaftlichn Themen. Sowieso braucht ma sei Smartphone für fast sämtliche gsellschaftlichn Veranstaltungen, weil da Gsundheitsnachweis digital is und als QR-Code vorzeigt werdn muass“, hod d Michaela weiter ausgführt.

Da Stefan sei Blick is jetzt steif woan und er hod starr auf de leicht verschneite Fahrbahn gschaut, während bloß des Scheibenwischerquietschn de kurze Stille unterbrochn hod.

„Woaßt wos, Michaela, i hob scho immer dran gglaabt, dass ois im Lebm an Sinn hod. I ko ned nachvollziehn, wia schwer de letzten 9 Jahr für di warn, denn für mi hod si ois ogfühlt wia a langer Schlaf, aber vielleicht hod des olle aa wos Guads! I seh ganz klar, dass si de Welt über de letzten Jahr Stückl für Stückl immer weiter auf an gfährlichn Abgrund zuabewegt hod.

Wo is des Mitanand bliebn? De Akzeptanz, dass jemand andere Ansichtn hod als i selber und si aa traut, de zu äußern? Wolln mir wirklich olle gleich sei, wia Maschinen programmiert auf des, wos grad am unauffälligstn ausschaut? Oder wolln mir ned jedem sei Vorstellung vom Lebm vergunna, solang er ned de unsere in Gfahr bringt?

Natürlich ko a Smartphone praktisch sei, aber soit ned da Mensch de Technik nutzn und ned umgekehrt? Seit i aufgwacht bin, seh i überoi bloß triste Gsichter, wo is de Lebensfreid hi, wo des Bsondere im kurzn Glücksmoment?

Stattdessn lassn mir zua, dass mir gegnanander aufghetzt werdn mit da Vorstellung, dass jeder zu ollem immer a Meinung ham muass! I mog mi ned rechtfertign für meine Fehler, de mi erst zum Menschn macha! Denn wos is da Mensch letztendlich? Mir san ned Gott, aa wenn des wohl manche de letzten Jahr dacht ham! Mir san Lebewesen, de verbundn san mit dera Welt, und jeder vo uns is a kloans Puzzlestückl vo am großn Ganzn, des mir ned segn, sondern bloß fühln kenna.

Vielleicht san mir manchmoi schwach vor lauter schlaue Gräte, de immer ois wia plant ausführn, aber mir san stark darin, de Erd mit olle ihre Wesn so zu akzeptiern, wia sie is, im Guadn und im Schlechtn! Lass uns zruckgehn zum Oafachn, Natürlichn, i mog wieder Mensch sei, genau wia vor 9 Jahr!“

Kurz vor ihra Wohnung war d Michaela in da kloana Siedlung mittn auf da Stroß stehnbliebn und hod zuagschaut, wia jetzt vui kloane Schneeflockn auf de Frontscheibn vo ihrm Auto gfalln san. Es is a seltsams Knistern in da Luft glegn, wia wenn de Welt für an klitzekloan Moment für de zwoa stehnbliebn wär, vielleicht hod se da Stefan sogar grad a bissl zruckdreht.

„I ko dir goar ned song, wia froh i bin, dass du wieder do bist!“, hod d Michaela ghaucht und hod dem Mo tief in de Aung gschaut, der ois bewahrt hod, wos mir uns de letzten Jahr Stückl für Stückl entrissn ham.

Hod dir da Artikel gfoin? Auf Facebook teiln Auf Instagram folgn

Mia san aa auf Instagram und Facebook

Neie Gschichtn, Bilder und Gaudi: gleich folgn und nix mehr verpassn.

Koarb
Nach oben scrollen