De Ältern kennan si no an de Zeit vor de Smartphones erinnern, ois ma Freizeitaktivitätn no persönlich bucht hod und ned üba Booking oda andre Aggregatorseitn, de wo Anbieta auf a Plattform zambindn, damit a Benutza schnäi des richtige fia erm finden ko.
Statt oiso a Hotel mit Stornierungsmöglichkeit spontan im Internet zu buchen hod ma entweda klassisch mitm Telefon ogruafa oda is oafach zur Unterkunft selm higfahrn und hod mit Händ und Fiaß an Preis ausghandlt.
De wenigstn Leid wissen, dass ma mit genau der Methode tatsächlich Gäid sparn konn und definitiv a besseres Buchungserlebnis hod, da ma mit de Menschn dahinta Kontakt hod. Da de Veranstalta imma um die 15% an den Aggregator obdrucka miassn san vui bereit, liaba persönlich an no bessern Preis ozumbieten. Mit der Methode griagt ma oiso beispielsweise a Übernachtung 10% billiger und da Anbieter hod aa nomoi 5% mehr Umsatz.
Der oa oda andere mog einwenden, dass ja dann de Aggregatorseitn da Ausgschmierte is, aba des stimmt nur in wenigen Fällen. Durch de massive Marktmacht vo de Marktführer üben de nämlich an massiven Druck auf de Veranstalta aus: wenn ma ned de vorgegebenen Verträge unterschreibt, hod ma mittlerweile fast gar koa Chance mehr gseing zu wern.
Bei Gutscheinanbietern is sogar no krasser, weil de im Foi vo a Nichteinlösung an kompletten Umsatz ois Gwinn eibhoitn und somit da Veranstalta fia sei Angebot übahaupt koan Cent ned siehgt. Warum soit oiso a Benutza ned an Standort vom Kochkurs auf da Aggregatorseitn suacha, danoch den Veranstalta üba Google ermitteln und den Gutschein direkt do kaffa?
Mia ham de letzten Jahr durch de moderne Technik verlernt, wia schee’s sei ko, wenn ma oafach mit fremde Menschn in Kontakt trett und beide durch de entstandene Beziehung sogar no an Vorteil ham. War ned de Idee vom Internet ursprünglich genau des: Leid aus oller Wäid zamzubringa?
Letzten Endes warad de Art vo Revolution sogar no mehra, ois auf beiden Seitn a paar Euro zum sparn: im Zeitoita vo multinationalen Konzernen, de imma mehr Macht sammeln, werds jeden Dog wichtiga, dass mia wieda lernan, echte Beziehungen aufzubauen.
Hand aufs Herz: wer gäd ned liaba zum bekannten Bäcka, der sei Handwerk no vasteht und sogar no a paar Gschichtn zum vazäihn hod, wos im Dorf so obgäd, ois beim Aldi auf an Knopf zum drucka und an aufbachan Doagrohling aus China zum kaffa?
As Internet is nur dann a guade Erfindung, wenns da Vorteil der Benutzung an Verlust an Menschlichkeit ned übasteigt. Wenn ma an oidn Spezl bei Whatsapp oschreibt, damit ma si kurz drauf auf a Hoibe Bier trifft, dann hod as Internet sein Job gmacht. Wenn ma aba aus Bequemlichkeit stundenlang hin- und hertextet, anstatt dass ma si kurz zamruaft oda sogar persönlich trifft, dann sorgt as Internet fia Vereinsamung.
Es liegt oiso an uns, ob ma uns wieda fia mehra echte Interaktion entscheiden, bei der letzten Endes da Mensch doch üba de Technik gwinnt.
