Ukrainische Traditionssubbn Bortschsch (борщ). Rezept vo ellerepublic.de
Rot wia de Mitra vom Nikolo is de Subbn, de oan noch am koidn Wintadog wieda richtig virrericht. Original stammt de Subbn aus da osteuropäischen Küch, hoaßt Bortschsch (борщ) und soit bei am Urlaub in Russland oda in da Ukraine auf olle Fälle moi probiert wern. Charakteristisch is de rote Farb vo da Subbn, de vo da Rahna kimmt und vui Kraft fia a koids dunkles Weda gibt. Gschmeidig is, dass de Subbn mit jedem moi Aufwarma bessa schmeckt, wesweng ma am besten mehra macht und de Subbn jedn Dog ois Vorspeis leffelt. Des Rezept is de vegetarische Version, ma ko bei Belieben aba no a Rindfleisch eineschneidn, wos da Subbn a nomoi a guade Notn gibt.
Zeitn
Arbeitszeit ungefähr a hoibe Stund, Zeitaufwand insgesamt zwoa Stund.
Zuatatn
- Zwoa Essleffe Olivenöl
- 3-4 kloane Zwiebeln, kloa ghackt
- Zwoa Knoblauchzechan, zadruckt
- Zwoa Lorbeerbladdl, kloa zadruckt
- A Essleffe Vollrohrzucka
- A hoibe Teelöffe Piment ois Pulva oda mit am Glasl kloagedruckt
- A Kilo Rahna in kloane Stickl gschnittn (ca. 1 cm)
- A Kilo Erdäpfe in kloane Stickl gschnittn
- Bladl vo da Rahna (optional)
- Oa Gelberuam kloagehobelt
- A hoibada Rotkoikopf kloagehobelt
- 6 mittlane Tomatn, kloa ghackt
- 2 Lita Wassa
- Gmiasbriah noch Gschmack
- Meersoiz und schwarza Pfeffa zum Würzn
- A Essleffe Apfeessig
- A weng Dill und Sauarahm zum serviern
Zuabereitung
- In am großn Subbntopf as Öl auf mittlere Stufn erhitzn und de Zwiebeln und an Knoblauch obrodn, bis weich san (8-10 Minutn)
- Lorbeerbladl, Piment, Zucka, Rahna- und Erdäpfestickl dazuageb’n und ab und zua umriarn (20 Minutn)
- Gelberuam, Rotkoi, Tomatn, Wassa und Briah dazuageb’n und zum Kocha bringa. Mit Soiz und Pfeffa würzn und an Herd auf mittlere bis kloane Stufn stäin. Zuadeckt köcheln lossn bis as Gmias woach is (ungefähr a Stund)
- An Essig dazua geb’n und mit Soiz und Pfeffa obschmecka. Wenn de Rahnabladl hergnomma wean, jetzad in d’Subbn doa und weidakocha lossn, bis de Bladl welk san
- An Dill dazua geb’n und mit Sauarahm serviern
